లోతుగా

లోతుగా

పాతుకు పోయిన వాటిని

చేతులతో పెకలించే కన్నా

కలిసిన రోజుల

రంగురంగుల

జ్ఞాపకాల ఆకులను

పెళుసు కొమ్మలతో

దులుపు కోవడమే

మేలు.

---

గుమి గూడిన ఆకులను

ఎగుర గొట్టి

గిరగిరా తిప్పి

నేల రాలుస్తుంది

సుడిగాలి.

---

గాలి వీచినప్పుడల్లా

పసిపిల్లల్లా

రోడ్డుకటూ ఇటూ

పరుగులు తీస్తాయి

రాలిన ఆకులు

---

ఎండిన చెట్టును

అంటి పెట్టుకొనే ఉంది

పండిన ఆకు

వెండిలా వెలిగే పగటి ఎండ-

ఉండుండి వీచే గాలి

వేచి చూస్తోంది.

---

చుట్టూ

ఆకులను రాల్చుకొని

మిగిలిన రంగుల ఆకులతో

గుట్టుగా రోజులు

నెట్టుకొస్తోంది

సంసారి చెట్టు.

---

తేమతో కూడిన పిల్లగాలి

ప్రేమగా వీచినా అసలు

ఆకులు రాల్చనంది

సోమరి చెట్టు:

లేత ఎండలో

అల్లాడుతూ

వెలిగిపోయే

పసుప్పచ్చ ఆకులు.

---

అన్ని ఆకులు రాల్చిన చెట్టు :

నిలువు గుబురు కొమ్మలను

వెలిగిస్తుంది వెన్నెల

నీ దిగులు జ్ఞాపకాల్లా…