ఒకొక్కసారి

ఒకొక్కసారి
అందాన్ని చూసిన కనురెప్పలు
ఆనందంతో ముచ్చటగా
టపటప కొట్టుకుంటాయి!

ఒకొక్కసారి
ఒక్కసారిగా అంతందాన్ని చూసిన కళ్ళు
విస్మయంతో ఆల్చిప్పలవుతుంటాయి...
అందాన్నంతా కళ్ళలోనే దాచుకుంటూ
అప్పుడప్పుడు కళ్ళలోనే
కలలు కంటుంటాయి!

ఒకొక్కసారి
ఆ అందాన్ని చూసిన కళ్ళు
కుళ్ళుకుంటుంటాయి...
తనలో లేని తనానికి లేకిబుద్ధి తోడై
అనేక వంకరలను ప్రదర్శిస్తుంటాయి!!!

ఒకొక్కసారి అందం
అందనంత ఎత్తులో ఒదిగి కూర్చుని
చందమామలోని చల్లదనాన్ని
వెనె్నలగా విరగబూయిస్తుంటుంది!

ఒకొక్కసారి
అందాన్ని బలవంతంగా అనుభవించాలనే
కఠిన కోర్కె రగిలి
కళ్ళకు మబ్బు పట్టినట్లు
జబ్బు పుట్టిస్తూంటుంది...
అందమైన గులాబీని నలిపి తుంపేసినట్లు
అంగాంగాన్నీ విరిచి వశపర్చుకోవాలనిపిస్తుంది!!

ఒకొక్కసారి కళ్ళు
ఓర్వలేక, ఓర్పు లేక
కఠిన పాషాణ హృదయమవుతుంటుంది...
కళ్ళనుండి ఆనంద భాష్పాలనే కాదు
యాసిడ్ సెగలనూ ఒలికిస్తూ
ఒళ్ళంతా దహించివేస్తూంటుంది!!!

ఇప్పుడైతే
అందానికే తన అందమంటే బెంగై కూర్చుంది!
ఇప్పుడైతే
తన అందమే తనకు శత్రువు అన్నట్లు
భయంతో పరుగులు పెట్టిస్తోంది!!?
ఇప్పుడైతే
యాసిడ్‌కీ తన అందమంటే
చచ్చేంత ప్రేమ పుట్టుకొచ్చి
తనవైపే అడుగులేస్తున్నట్లు జడుపు పుట్టుకుంటోంది!!!!
ఇప్పుడైతే అందం
అందహీన మొహం పెట్టి
అంద‘వికారం’గా తయ్యారయ్యేందుకు
సిద్ధపడుతోంది!!!??