నువ్వు శాశ్వతం .. నేను అసత్యం

ఏ దివిలో విరిసిన మల్లెపూవువో
ఏ తోటలో విప్పారిన కొమ్మవో
కదిలే నదిలా .. కమ్మని కలలా
నింగిలో వెలుగులు విరజిమ్మే వెన్నెలలా
నాలో నిరంతరం ప్రవహించే రక్తంలా
నాకు ప్రాణ ప్రదమైన శ్వాసగా
నీతో కలిగిన పరిచయం
నన్ను మనిషితనం నుంచి
మానవత్వం దిశగా మార్చేలా చేసింది ..
పండు వెన్నెల్లో
నీ రూపం .. గాలిగా మారి
నా పెదవులను స్పృశించింది
నువ్వో జల్లుగా నా గుండెను
తడుముతుంటే .. నేను
ఆకాశమై నిన్ను హత్తుకుంటూ
ఉండిపోతాను ..
నీ తలపుల్లో జీవిస్తూ
నీ గుండెల మీద వాలిపోతాను
నాలో మిగిలిపోయిన కన్నీళ్లతో
అభ్యంగపు స్నానం చేసి
పునీతుడవుతాను ...
ప్రేమంటే మైకమా .. లేక సాగే ప్రయాణమా
కానే కాదు .. నీకు నేను .. నాకు నువ్వు
ఒకరికి మరొకరం .. కష్టంలో ఇద్దరమే
ఇష్టంలో మనమే ..
నువ్వు లేని చోట
మాటలుండవు ... చూపులు ఉండవు
కళ్ళు ఘనీభవిస్తాయి
గుండె గునపమై పోతుంది
నీ కోసం చావును
ముద్దాడేలా చేస్తుంది ..
నువ్వు శాశ్వతం .. నేను అసత్యం