నవ్విపోదురు గాక నాకేటి సిగ్గు,

నవ్విపోదురు గాక నాకేటి సిగ్గు,
నా యిచ్చయే గాక నాకేటి వెరపు ? 
కలవిహంగమ పక్షముల దేలియాడి
తారకామణులలో తారనై మెరసి
మాయ మయ్యెదను నా మధురగానమున!
నవ్విపోదురు గాక నాకేటి సిగ్గు,

మొయిలు దోనెలలోన పయనం బొనర్చి
మిన్నెల్ల విహరించి మెరపునై మెరసి 
పాడుచు చినుకునై పడిపోదు నిలకు 
నవ్విపోదురు గాక నాకేటి సిగ్గు,

తెలిమబ్బు తెరచాటు చెలి చందమామ 
జతగూడి దోబూచి సరసాల నాడి
దిగిరాను దిగిరాను దివినుండి భువికి
నవ్విపోదురు గాక నాకేటి సిగ్గు,

పక్షినయ్యెద చిన్ని ఋక్ష మయ్యెదను 
మధుప మయ్యెద చందమామ నయ్యెదను
మేఘ మయ్యెద వింతమెరపు నయ్యెదను
అలరు నయ్యెద చిగురాకు నయ్యెదను
పాట నయ్యెద కొండవాగు నయ్యెదను 
పవన మయ్యెద నేను మారిపోయెదను.
నవ్విపోదురు గాక నాకేటి సిగ్గు,
నా యిచ్చయే గాక నాకేటి వెరపు