నా ఆనందం

నిన్ను చూసిన క్షణం నా ఆనందం
అక్షరాలలో అభివర్ణించేది కాదు
అందుకు బదులుగా
నక్షత్రాలన్నీ నింగినుండి పోగుచేసి
నీపై కురిపించాలనివుంది
నిండు చంద్రుడిని ముప్పవు ముక్క విరిచి
కర్పురంలా వెలిగించి నీకు దిష్టి తియ్యాలనివుంది
ఇంద్రధనుస్సుని తెచ్చి
నీ పసిపాదాలు కందకుండా తివాచిలా పరచాలనివుంది
మేఘాలన్నీ చెరిపేసి ఆకాశాన్ని మడతపెట్టి
నీ పానుపులా మార్చాలనివుంది
ఒక్క మాటలో
నా ఆనందాన్ని రెట్టింపు చేసి
నీకు అందిచాలనివుంది నా అనుబంధమా